ខេត្តព្រះវិហារ ឯកឧត្ដម ឡុងសុវណ្ណ ប្រធានក្រុមប្រឹក្សាខេត្ត ឯកឧត្ដម ប្រាក់សុវណ្ណ អភិបាលនៃគណអភិបាលខេត្តព្រះវិហារ បានដឹកនាំមន្ត្រីរាជការ មន្ទីរ-អង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ យុវជន លោកគ្រូអ្នកគ្រូ ប្រារព្ធខួបអនុស្សាវរីយ៍លើកទី៦៧ នៃទិវាបុណ្យឯករាជ្យជាតិ ៩ វិច្ឆិកា(៩ វិច្ឆិកា ១៩៥៣-៩ វិច្ឆិកា ២០២០)ដែលកម្ពុជាទទួលបានឯករាជ្យ ពីអាណានិគមនិយមបារាំង ស្របជាមួយនឹងខួប១៦ព្រះវស្សាៃការយាងគ្រងព្រះបរមសិរីរាជសម្បត្តិរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាព្រឹកថ្ងៃទី៩ ខែវិច្ឆិកា ឆ្នាំ២០២០ នៅស្តូបវិមានឯករាជ្យ ក្រុងព្រះវិហារ ខេត្តព្រះវិហារ។
ឯកឧត្តម ប្រាក់ សុវណ្ណ អភិបាលនៃគណៈអភិបាលខេត្ត បានមានប្រសាសន៍សម្តែងនូវករុណាទគុណដ៏ឧត្តុង ឧត្តមបំផុតនូវស្នាមព្រហស្ថ ព្រះរាជលំអាន ព្រះវីរភាព ប្រកដោយទស្សពិតរាជធម៌ ព្រះរាជបញ្ញាញាណភ្លឺស្វាង ក្នុងព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទសម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌនៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជានាថ្ងៃ៩ ខែវិច្ឆិកា ឆ្នាំ១៩៥៣ ដែលស្នាមព្រះហស្ថដ៏ឧត្តុងឧត្តមនេះ បានដិតជាប់ក្នុងក្រអៅបេះដូងកូនខ្មែរគ្រប់ជំនាន់ ។
ឯកឧត្តម អភិបាលខេត្ត បានបន្តថា រាជរដ្ឋាភិបាលកម្ពុជាដឹកនាំដោយសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី ក្រោមម្លប់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា តែងតែដង្ហែរតាមព្រះរាជតម្រិះដ៏ថ្លៃថ្លារបស់ព្រះករុណាព្រះបាទសម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ប្រទេសជាតិទទួលបាននូវសុខសន្តិភាព បង្រួបបង្រួមជាតិ ឯកភាពជាតិ និងការអភិវឌ្ឍរីកចម្រើនដូចសព្វថ្ងៃ។
ក្នុងឱកាសនោះដែរឯកឧត្តមអភិបាលខេត្ត ឯកឧត្តមប្រធានក្រុមប្រឹក្សាខេត្ត ឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំងបី អញ្ជើញប្រគល់ជូននូវអំណោយមនុស្សធម៌ដល់អតីតយុទ្ធជន គ្រសារពលី គ្រួសារក្រីក្រ សរុប៤៨គ្រួសារដោយមួយគ្រួសារៗរួមមាន៖អង្ករ២០គីឡូ មី១កេស ត្រីខ ១យួរ ទឹកស៊ីអីវ ១យួរ ទឹកបរិសុទ្ធ ១យួរ សារុង១ ក្រមា១ ភួយ១ មុង ១ និងថវិកាមួយចំនួន ។
