នារសៀលថ្ងៃសុក្រ១៥កើត ខែមាឃ ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី០៧ ខែកុម្ភៈ ឆ្នាំ២០២០ រដ្ឋបាលខេត្តព្រះវិហារ រៀបចំកិច្ចប្រជុំគណៈបញ្ជាការឯកភាពខេត្ត ក្រោមអធិបតីភាពឯកឧត្តម ប្រាក់ សុវណ្ណ អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត ដោយមានការចូលរួមពីមេបញ្ជាការប្រចាំទិសភូមិភាគ៤ មេបញ្ជាការកងកម្លាំងទាំងបីក្នុងខេត្ត មេបញ្ជការកងពលធំអន្តរាគមន៍លេខ៣ មេបបញ្ជាការនគរបាលការពារព្រំដែន កងពលតូចតាមបណ្តោយព្រំដែន ប្រធានមន្ទីរអង្គភាពជុំវិញខេត្ត អភិបាលក្រុង ស្រុក អធិការក្រុង ស្រុក មេឃុំចៅសង្កាត់ មេប៉ុស្តិជាច្រើនរូប។

ក្នុងកិច្ចប្រជុំនេះក៏បានស្តាប់របាយការណ៍ស្តីពីសន្តិសុខសណ្តាប់ធ្នាប់សាធារណៈឆ្នាំ២០១៩ និងខែមករា ឆ្នាំ២០២០ ពីស្នងការដ្ឋាននគរបាលខេត្ត និងរបាយការណ៍ស្តីពីការងារបង្ក្រាបបទល្មើសធនធានធម្មជាតិ ពីមន្ទីរបរិស្ថានខេត្ត ជាពិសេសបានស្តាប់និងដោះស្រាយបញ្ហាប្រឈមនានាក្នុងដែនសមត្ថកិច្ចជាពិសេស បញ្ហព្រៃឈើ បញ្ហាដីធ្លី ដែលកំពុងកើតឡើងនៅតាមមូលដ្ឋាន ភូមិ ឃុំ ។

មានប្រសាសន៍ក្នុងឱកាសនោះអភិបាលខេត្ត បានជម្រាបពីកិច្ចការចាំបាច់គឺក្តាប់សភាពការណ៍ ទូទៅ និងដាក់ចេញវិធានការអនុវត្ត កិច្ចការពារ សន្តិសុខ សណ្តាប់ ធ្នាប់ សាធារណៈ ធានា និងរក្សាបាននូវសភាពការណ៍ស្ងប់ស្ងាត់ និងល្អប្រសើរបានគ្រប់គោលដៅ យុទ្ធនាការបង្រ្កាប និងទប់ស្កាត់បទល្មើសធនធានធម្មជាតិនៅទូទាំង ប្រទេស និងក្នុងភូមិសាស្រ្តខេត្តព្រះវិហារ។ លើសពីនេះទៀតនាថ្មីៗនេះការបង្ក្រាប បទល្មើស គ្រឿងញៀនដ៏ធំ កាលពីចុងខែធ្នូ កន្លងទៅ នៅ អានសេះ ការបង្ក្រាប ក្រុម ជនល្មើស រាវរកវត្ថុបុរាណនៅចំណុចប្រាសាទខ្នារ ស្ថិតក្នុង ភូមិ ក្រឡាពាស ឃុំព្រីងធំ ស្រុកជាំក្សាន្ត និង ការបង្ក្រាប ល្បែងជល់មាន់ កាលពីម្សិលមិញ ព្រមទាំងការកើតឡើងគ្រោះថ្នាក់ចរាចរណ៍ជាច្រើនករណី ព្រមទាំងបណ្តាលឲ្យស្លាប់ មនុស្សផងដែរ ។

ឯកឧត្តមអភិបាលខេត្តបានដាក់ចេញនូវវិធានការមួយចំនួនដូចខាងក្រោម៖
១/ បញ្ហាដីធ្លីៈជម្លោះដីធ្លី សូម ឱ្យ អាជ្ញាធរក្រុង- ស្រុក នីមួយៗ និង មន្ទីររៀបចំដែនដី នគរូបនីយកម្ម និងសុរិយោដីខេត្ត ធ្វើ បញ្ជី បច្ចុប្បន្ន ភាព ករណីទំនាស់ទាំងអស់ក្នុងដែនដីនីមួយៗ របស់ខ្លួនបញ្ជូនមករដ្ឋបាលខេត្ត ហើយជាពិសេស រដ្ឋបាលក្រុង-ស្រុក នីមួយៗ ត្រូវខិតខំ ដោះស្រាយវិវាទដីធ្លី ទាំងនោះ ក្នុងសមត្ថកិច្ច របស់ខ្លួនឲ្យមានប្រសិទ្ធភាពខ្ពស់ ដោយភាព យុត្តិធម៌ និងតម្លាភាពប្រកបដោយ បរិយាប័ន្ន។
២/បញ្ហបទល្មើសធនធានធម្មជាតិៈរដ្ឋបាល ក្រុង- ស្រុក នីមួយៗ ត្រូវធ្វើការណែនាំផ្សព្វផ្សាយដល់ ប្រជាពលរដ្ឋ កុំ ឱ្យ គាត់ ទៅ ចូលទន្ទ្រាន ដីព្រៃ ដី សហគមន៍ ឬ ដី បរិស្ថាន ឬតំបន់ការពារផ្សេងៗ និង ចាត់វិធានការចំពោះ មេខ្យល់ឱ្យ បាន ។ មួយវិញទៀត ខ្ញុំ សូម ឱ្យ ធ្វើ បច្ចុប្បន្នភាពបញ្ជី ដី របស់ រដ្ឋ និង ចំនួនប្រជាពលរដ្ឋដែល កំពុងអាស្រ័យផល ជាក់ស្ដែង និង កំពុងទន្ទ្រាន កាន់កាប់ លើដី របស់ រដ្ឋដោយខុសច្បាប់ រួចបញ្ជូនមករដ្ឋបាលខេត្ត ។ហើយអាជ្ញាធរ ពាក់ព័ន្ធ ជាពិសេស ឆ្មាំ បរិស្ថាន និង សមត្ថកិច្ច ត្រូវ រួមគ្នាទប់ស្កាត់ បទល្មើស ឱ្យបានទាន់ពេលវេលា ជាពិសេស បទល្មើស ដែលកំពុងកាប់ ក្នុងព្រៃ និងពេល ដឹកចេញពី ព្រៃមក ត្រូវដាក់កម្លាំងល្បាតនិងប្រមាញ់ មុខសញ្ញាសំខាន់ៗឱ្យបាន ប្រកបដោយ ប្រសិទ្ធភាព ។
៣/ អាជ្ញាធរមូលដ្ឋាន ត្រូវណែនាំបងប្អូនប្រជាពលរដ្ឋ ឱ្យមានការ ប្រុង ប្រយ័ត្នខ្ពស់ ចំពោះភ្លើងផ្សែង នារដូវក្ដៅនេះ និង កម្លាំងពន្លត់អគ្គិភ័យ ត្រូវត្រៀមខ្លួន ឱ្យបានរួចរាល់ជានិច្ចជៀសវាងពេលប្រតិបត្តិការ បែរជា អត់មានទឹក ។
៤/គ្រោះថ្នាក់ចរាចរណ៍ ៖ សូមឱ្យអង្គភាពជំនាញពាក់ព័ន្ធបន្ថែម ការ យក ចិត្តទុកដាក់ ដោយ អនុវត្តការរឹតបន្តឹងចរាចរណ៍ឱ្យមាន ប្រសិទ្ធភាព ។
៤/ករណីផ្ដល់សេវាសាធារណៈ ៖ សូមស្នើដល់រដ្ឋបាលក្រុង-ស្រុក ត្រូវ ពង្រឹង និងពន្លឿនការផ្ដល់សេវាសាធារណៈ តាមយន្តការច្រកចេញចូលតែមួយ ឱ្យបានឆាប់រហ័សជូនបងប្អូនប្រជាពលរដ្ឋ យើង ។
៥/ករណី ប្រជាពលរដ្ឋ ធ្វើ ចំណាកស្រុក៖ សូមស្នើ រដ្ឋបាលក្រុង-ស្រុក នីមួយៗ ដឹកនាំធ្វើបញ្ជីបច្ចុប្បន្នភាព អំពីការធ្វើ ចំណាកស្រុក របស់បងប្អូន ប្រជាពលរដ្ឋនៅមូលដ្ឋានរបស់ខ្លួន ដើម្បីជាមូលដ្ឋាន ក្នុងការដោះស្រាយ រក មុខរបរ និង ការងារជូនពួកគាត់ នៅមូលដ្ឋានវិញ ។